B'a'nchite' u chusb'ale' uve' tu ka'va'l yolb'al, ech kole' u chusb'ale' ti yolb'al unq'a talintxa'e' tan a'e' ni a'q'on ku' ixeteb'al vitxumb'ale' as a'e' la lochon vet u talintxa'e' ti' taq'on vuvete'.

Uma't yolb'al uva' la itx'olve'te' as a'e' la eq'on katikat kuxhtu'. U chusb'ale' tu ka'va'l yolb'al a' ni tokkat ile' uva' la itx'ol u talintxae' iyolb'ele', tab'ita', itz'ib'ale', as isik'lele' ka'va'l unq'a yob'ale'.

Ech kole' uma'l u chusb'ale' kat aq'chu svej ti' uva' kam kuchusun tu kava'l yolb'al as b'an tan ni locho' ti' kuchusat unq'a talintxae'.

B'a'n chit unq'a txumb'ale' kat achu sve as a'e' tuk untxakonsa xo'l unq'a talintxa'e' as ti' ilochat ka't unq'a chusule' tu u chusb'ale' uve' ni q'aqom vukat tan asoj la kutxakonsa as at chit ivatze' la q'ile'.

    Carlos Pérez
    Director del Colegio Luz y Vida
    Aldea Salquil Grande

B'axa.

Niku tantioxhi tu helps international.

Ti' tiq'ot b'eno tu vat tenam, ti' ik'ulpu vat txumb'al tetz ti' u chusb'al tetz ka'va'l yolb'al.

Aatz q'u txumb'al q'ul aq'axq'e tzi' tiira ib'oq'ol su ku vatz. Tan vet kuchab'a joltu txumb'al kanich taq'ax u chusb'al xol q'u talaj nitxa. Utz kanich ipaal u tootzajib'al, aatz nitek motx itxol q'u chusb'al. Utz echat majte, kanich ichusax q'u talaj nitxa' tu k'ab' a'l yolb'al majte.

Tan atil jolot txumbál, atz ye'ich' q'otzaj. Unchee ti' tek q'u´l vet chusaxko' tzi'. Vat kuchab'a, ech saku b'an tek xol q'u talaj nitxa':

Ech txanel ichab'ata', q'u chusb'al tetz tu vi yolb'al, ech q'on tek sichab'a va't yolb'al majte echa' u kaxhlan yol.

    Juana de la Cruz Medina
    Juana Priscilla Cruz García

La qaq' ta'ntiixh te unq'a qitz'in qatzike' tu Instituto Linguístico de Verano (ILV) uva' kat b'anon iya'l ti' qeq'ol tu u atinb'ale' uva' kat b'ex kuchuskat qib' ti' uva' kam kuchusun tu u kuyolb'ale'. As qootzale', asoj la kub'anb'e moj la qoksa titxa'k ti' uva' la chusun o' tu ka'va'l yolb'al, as ch'iumal la ib'ane' as la qil uma'l u b'a'n.

As cheel at ve't uma'l qijatz ti' uva' jank'al uva' kat kuchusa la kub'anb'e ti' chuspu ka'taj chusul, as ti' ipaxsal itzib'lal xo'l unq'a chusule' uva' aya'l chit ik'u'l ti' ichusun tu ka'va'l yolb'al, kaxhlan yol as tuk' kuyolb'al.

    Te'k tuk' u pap Pi'l (Carlos and Felipe)
    Colegio Luz y Vida tu Nimla Salch'il, Naab'a', K'iche', Ixi'm Tx'ava'
    CECI-Centro Educativo Cristiano Ixil

Kat b'ex unk'ul uma'l u chusb'alib' tu Dallas, Texas, Estados Unidos Jala a'. As acha'v chit unq'a chusb'alib'e' ti' uva' kam kuchusat unq'a talaj intxa'e' tu b'axa tanul chusb'alib' tu ka'va'l yolb'al. As ni tal chajaak uva' aal chit b'a'n uva' la kuchus chiintxa b'axa tu viyolb'ale', aq'al uva' b'a'n tel chiintxa tu vichusb'alib'e'. As ech u txumb'ale' ato'k ta'n ka'taj tenam as ni tilchu icha'xalil u chusb'ale'.

As kat tal unq'a chusule' uva' kat chusun o' tu o'va'l u q'iie' kat ib'ana uva' ilel ve't ta'n chajaak uva' aal b'a'n uva' ech tuch u chusb'alib'e' la ib'ane', aq'al uva' acha'v ichusat tib' chiintxa', as ye'l chiintxa' la mox tz'ejxi.

As nimal kuxh u txumb'ale' kat taq' chajaak sqe ti' uva' kam kuchusun xo'l unq'a talaj intxa'e' la ib'ane', as la chit ok o' stilil ti' u qaq'one', tan oyeb' chit ivatz unq'a talaj intxa'e' as tuk' unq'a b'aalae', tan nimal puaj nisotzsa chajaak tu uma'l yaab'.

As ech kuxhe' b'a la val sete vitz'in vatzik, ex uva' nisik'len u u'uja'. As la vaq' ta'ntiixh te u Tiixhe' b'axa, tan Aake' kat aq'on vuntiichajile'. As la vaq' ta'ntiixh te unq'a qitz'in qatzike' (SIL) uva' kat k'ulun o', as tuk uva' kat ichuk chajaak u chusule' uva' kat chusun o' tu o'va'l u q'iie' kat ib'ana.

As la vaq' ta'ntiixh te unq'a qitz'in qatzike' uva' tu HELPS ti' vilochb'al chajaake' ti' qoon tu atinb'ale' uva' kat b'exkat o', as Tiixh koj la lochon chajaak, as Tiixh la aq'on ich'exel te chajaak. As la vaq' ta'ntiixh te ak nan Sharon uva' kat toksa aak xe' vaama uva' la b'en in tu atinb'ale' ti' u chusb'ale'.

Ine' in Pi'l uva' ni taq'onvu tu "Atinb'ale' Tetz Chusb'alib' tu Kuyolb'al tuk' Tetz Tiixh"

    (ACHUSYOLTIIXH)
    Felipe Chel Santiago
    CECI, Nebaj, El Quiché.